له‌چوارچێوه‌ی هه‌وڵه‌كان بۆ ئاوڕی زیاتر له‌ژیان و گوزه‌رانی په‌نابه‌رانی كوردانی رۆژئاوا، مه‌سعود بارزانی سه‌رۆكی هه‌رێمی كوردستان پێشنیاریی كرد، 20% ی بودجه‌ی مانگێكی سه‌رجه‌م داموده‌زگاكانی حكومه‌تی هه‌رێمی كوردستان بۆ ئه‌و په‌نابه‌رانه‌ ته‌رخان بكرێت.  

لە نامەیەكیدا بۆ سەرۆكایەتی ئەنجومەنی وەزیرانی هەرێمی كوردستان، بارزانی ئه‌م پێشنیاره‌ی كرد، وه‌ك هه‌وڵێك بۆ هاریكاریی زیاتری ئاوارەكانی ڕۆژئاوای كوردستان.

به‌پێی پێشنیاره‌كه‌ ئه‌و بودجه‌یه‌ له‌ هەر سێ سەرۆكایەتی هه‌رێم و حكومه‌ت و په‌رله‌مان و لایەنە سیاسییەكان و سه‌رجه‌م دامودەزگاكانی حكومەتی هەرێم كۆده‌كرێته‌وه‌ . 

ئه‌مه‌ش ده‌قی نامه‌كه‌ی سه‌رۆكی هه‌رێمی كوردستانه‌: 

بۆ/ سەرۆكایەتیی ئەنجوومەنی وەزیرانی هەرێمی كوردستان.. بەڕێز

سڵاوێكی گەرم..

یارمەتیدانی ئەو خوشك و برایانەی لە ڕۆژئاوا هاتوونە و پەنایان بۆ هەرێمی كوردستان هێناوە ئەركێكی نەتەوەیی و مرۆڤدۆستانەیە. لەپێناو یارمەتیدانی باشتر بۆ ئەو ئازیزانە پێشنیار دەكەم بە ڕێژەی 20%ـی میزانەی یەك مانگی هەموو حزبەكان و هەر سێ سەرۆكایەتییەكەی هەرێمی كوردستان و تێكڕای دامودەستگە كارگێڕییەكانی حكوومەتی هەرێمی كوردستان بۆ هاوكاری و یارمەتیدانی خوشك و برا پەنابەرەكانی كوردی ڕۆژئاوا تەرخان بكرێت.

مسعود بارزانی

سەرۆكی هەرێمی كوردستان